CEBUANO : Tungod sa APEC, hayan mudaghan ang Export Processing Zones

Hayan mapun-an pa unya ang mga Export Processing Zones dinhi sa Probinsya sa Sugbo sa mga umaabot nga mga katuigan.

Kini usa unya sa positibong resulta sa gipahigayon nga mga tigum sa Asia Pacific Economic Conference (APEC) dinhi sa lalawigan sa Sugbo.

Mao kini ang butyag ni Cebu Gobernador Hilario Davide III sa mga mga tigbalita nga nag base sa International Media Center karong adlawa.


Matod ni Davide nga ang gipahigayon nga mga tigom, dako nga posibilidad nga makapuno sa siyam na nga mga EPZ's nga anaa sa probinsya.
Gitan-aw kini nga ang mga negosyo mukatag na ngadto sa mga kalungsuran og dili lamang sa Metro Cebu.

"Mao na ang tumong sa paghangyo sa mga negosyante sa pagduol sa mga gagmayng negosyante nga anaa sa countryside aron mulambo pd kini sila," matod ni Davide.

Kun anaa na ang dugang nga mga EPZ og negosyo sa mga kalungsuran, dili na unya maghuot pa ang mga dakbayan sa Sugbo, Mandaue og Lapulapu.

Sa pagkakaron, si Davide nagkanayon nga na bibo ang daghang mga industriya sa pagpangandam pa lang sa APEC meetings.

Lakip na niini ang manufacturing sama sa mga furnitures, fashion accessories, native products, og pagkaon.

Aduna pod trabaho ang naabli tungod sa panginahanglanon sa mga hotels og mga restaurants.

Ang turismo na bibo usab human daghan mga delegado ang nanggawas og misuroy sa mga kasikbit sa Sugbo.

"Mapasigarbohon ako nga makadungog og mga maayong mga sugilanon gikan sa mga delegado nga nakaangay sila sa ilang mga nasinati dinhi sa atong probinsya," matod ni Davide.

Iyang pasalamat sa mga Sugboanon nga misabot kun aduna man ganing mga inconveniences nga nasinati sama sa traffic og pagsirado sa dalan.

"Adtong tan-awon ang dakong benepisyo nga makuha nato pinaagi sa pag pahigayon niining mga international nga mga kalihokan," matod ni Davide.

Si Davide ang nangulo sa local organizing committee. Adunay 87 ka mga tigum ang  ipahigayon sa Sugbo gikan sa Agosto 22 hangtud sa Septembre 11.