Purlon gamiton sa kapolisan sa kampanya batok droga sa mga sam-ang

Pahimuslan sa mga kapolisan sakop sa Cebu City Police Office (CCPO) ang kahigayonan sa kampanya batok sa droga.

Tungod kay ang bagang duot adto man gayod sa mga sam-ang, nakadesider sila si PSSupt. Eric Noble, ang hepe sa CPPO, sa pagdala sa kampanya ngadto sa mga sam-ang.

Ug unsa ang ilang gamiton? Purlon!

"Adunay mando ang tanang kapolisan nga kinahanglan makita ilang presensya sa mga sam-ang ug magdala og purlon," matod ni Noble.

Siya nagkanayon nga hangyuon gihapon sa mga kapolisan ang mga gidudahang tigamit ug tigpayuhot og ginadiling droga sa paghunong na sa maong salaod.

Tan-awa ning Video sa Purlon og kapolisan
 
Adunay 152 ka mga menteryo ang probinsya sa Sugbo og kapin sa 900 ka mga polis ang gipakatap niini.

Carcar City Police on the move 

 



Aduna pa gyud mga mukabat og 1600 ka mga force multipliers aron pagsiguro nga hapsay ug luwas ang maong mga kalihokan.




Ang pagamit og mga purlon o funeral cars apil sa mga estratihiya sa "Oplan Taphang" (Tapok Hangyo) diin pahimuslan sa mga kapolisan nga makabuhat og mga adbokasiya kabahin sa paghunong ug pagdili sa ginadiling droga,(fcc)

Mga centenarians ipalista sa gobyerno aron ma recognize!

DSWD sa mga kabanay nga dunay centenarian ug 99 anyos pataas nga ipalista sa kagamhanang lokal diin sila nahisakop

Ang Department of Social Welfare and Development, Field Office No. 7 (DSWD-FO7) nanawagan sa mga kabanayan nga dunay gi-atiman mga centenarian o tiguwang sa ilang panimalay nga nag-edad ug 99 anyos ug pataas, atol sa gipahigayon nga Kapihan Sa PIA sa Ramon Aboitiz Foundation Inc (RAFI) ning dakbayan.

Si Artemia Degamo, Social Welfare Officer IV sa DSWD-FO7 nagpahibalo ug nanawagan niadtong nag-atiman o may mga kaliwat nga nagpangedaron ug 99 anyos nga moadto sa kinaduolan nga opisina sa DSWD nga anaa sa ilang munisipyo o dakbayan.

Kini aron sila masakop sa selebrasyon sa ika100 nilang tuig nga nataohan ug maapil sila sa listahanan sa tagaanan ug P100,000 sunod tuig.

SWO IV Artemia Degamo 

Dugang ni Degamo, nga magdala lamang ug pagmatuod sa pangedaron sa tigulang sama sa birth certificate, marriage certificate, tala o rekord sa pag-eskuyla o pagpanarbaho o kaha birth certificate sa anak.

Samtang kadtong nag-edad ug usa gatos ug pataas, segun sa Akta Republika Numero 10868 o Centenarian Act of 2016 nga gilagdaan ni Presidente Rodrigo Duterte niadtong Hunyo 2016 ang DSWD mohatag ug pasidungog nga kwarta nga balor ug P100,000 cash gift nga tax-free ug plake sa pagpahalipay gikan sa Presidente, dugang ni Degamo.

Matod usab sa opisyal nga ang mga local government units (LGUs) adunay mandato nga mohatag usab sa centenarian o tigulang apan depende sa pundo nga mahimo pang gamiton sa mao nga katuyuan.

Ang Cebu City Government mohatag ug P100,000 ug ang centenarian usa ka pensionado sa Government Service Insurance System (GSIS), makadawat kini ug P100,000.

Gipahibalo usab ni Degamo nga kadtong mga uyamot ug timawa nga mga tigulang nga nag-edad ug 60 anyos, walay ginadawat nga pension o suportang regular gikan sa anak, hatagan sa DSWD ug Social Pension Program nga P500 matag tulo ka bulan o quarterly.

Adunay natala nga 236 nga mga centenarians sa rehiyon ug ang probinsiya sa Cebu ang may kinadahanan nga 145 ka buok.

DSWD Information Officer Leah Quintana 

Sa pagpanapos, si DSWD Regional Information Officer Leah Quintana midasig sa pagpaghigugma ug sa pagrespeto sa mga tigulang. (Juju Empuerto)

Coastal Law Enforcers sa Bohol ug Sugbo mipaubos sa Communications and Media Relations Training

The participants of the Communications and Media Relations Seminar for Coastal Law Enforcers after the training. 

Mga coastal law enforocers sa lalawigan sa Bohol  ug Sugbo mipaubos sa bansaybansay sa komunikasyon.

Aron nga sila makahibaw na nga mupaambit sa ilang mga nahimo isip tigpatuman sa balaod sa kadagatan, mipahigayon og training ang Bureau ofFisheries and Aquatic Resource 7 (BFAR)  ug ang United States Agency for International Development (USAID).

Former The Freeman Sports and Managing Editor Nimrod Quinones gives background
on Communication and Media Relations

Ubos sa Ecofish Project, tulo ka adlaw ang gigahin alang sa mga  Fisheries Management, Regulatory and Enforcement Division (FMRED) sa BFAR-Central Visayas.  

Adunay mga misalmot nga mga information officers, Sangguiang Bayan members,  ug mga nagulo sa  Bantay Dagat groups.

Anaa pod mga sakop sa Cebu ProvincialPolice Office (CPPO) ug Philippine Coast Guard Auxiliary.

Ang mga local government units sa lalawigan sa Bohol nga misalmot mao ang  Bien Unido, Buenavista,  Tubigon, Clarin, Buenavsta, Getafe, Talibon, Trinidad, Inabanga ug Ubay.

PIA7 RD and Comm Plan Resource Person Minerva Newman with the Inabanga, Bohol group 

Ang mga nagdumala sa bansay bansay mga aktibo sa media ug mga miembro sa Philippine Information Agency.

Gitudluan una sila sa importansya sa pagsubay sa tukmang komunikasyon, dayon gitudluan kun unsaon pagsuwat og mga balita ug mga maayong istorya kabahin sa  matang sa ilang trabahao gikan sa kalihokan, responsibilidad ug  mga adbokasiya.

The Freeman Editor John Destacamento talks about Basic News Writing 

Gitudluan usab sila unsaon pagamit sa Social Media sa pagpakatap sa 

ilang mga balita.

Sa katapusang bahin, gipailawm sila sa usa ka workshop diin tudluan sila unsaon pagtubag ug pagmantiner og maayong relasyon sa mga sakop sa media.

Ilang nasayran nga ang media maoy katambayayong sa pagpakatap sa publiko kabahin sa pagsalbar, pag amping sa kinaiyahan u gang kadagatan.

PIA Cebu Infocen Manager Rachelle Nessia on "Press Release Writing,
Communicating Effectively and Social Media 101"

Daghang mga maayong balita ang wala nahibaloan kabahin sa coastal law enforcement tungod kay walay media ang nakaahibalo ug dili makahibawo ang mga nahitungdan og unsaon pag sampit sa media.

Gibuhat ang maong pagbansay bansay duyog sa pagsaulog sa World Fish Conservation Week.(fcc/PIA7-Cebu)

Mga Information Officers sa Sugbo musunod sa FOI

Gipasalig sa mga Information Officers sa Sugbo ang pagtamod sa Freedom of Information (FOI) nga direktiba ni Presidente Rodrigo Duterte.

Ang Cebu Association of City and Municipal Public Information Officers (CAOCAMPIO) mipasar og isa ka resolusyon sa pormal nga pag-adopt sa FOI.

Kini human si Gobernador Hilario Davide III, mipakanaog og isa ka direktiba nga nagmando sa tanang mga opisina ubos sa Executive sa pag sunod sa FOI ug mga mekanismo niini.

Nakita sa mga miembro sa CAOCAMPIO nga gikinahanglan nila ang pag tamod sa maong direktiba tungod kay sila mismo ang labing unang nahingtungdan isip information officers.

Oscar Canino, MPIO Aloguinsan

Ang maong mosyon giduso ni PIO Oscar Canino sa lungsod sa Aloguinsan ug gisigundahan kini PIO Roger Almonicar sa lungsod sa Daanbantayan.




 Gikasabutan sa mga information officers nga sila na ang maga awhag sa ilang tagsa tagsa ka mga lungsood sa pagadopt usab sa maong direktiba.

Ang FOI nagamando sa tanang mga opisina nga anaa ubos sa Executive sa pagpatuman og mga lakang nga maka pakita nga transparent og walay gitaguan ang gobyerno.

Gimandoan nga ang tanang mga pakisayod o request of official records gikinahanglan nga adunay aksyon sud sa lima ka adlaw. 

Gikinahanglan usab nga ang mga  online government portals o websites gikinahanglan nga accessible na sa Nobyembre 24 ning tuiga.
 
 Sa susamang kalamboan, mipasar usab og resolusyon ang League of Municipalities Cebu Chapter human kini gibisita sa mga opisyales sa CAOCAMPIO og gitunolan og kopya sa FOI Executive Order.

Si Tuburan Mayor Democrito "Aljun" Diamante nagkanayon nga na approbar ang Mosyon nga gipasaka ni Sanat Fe Mayor Jose Esgana alang sa pag adopt sa FOI.