Sulbad sa kakuwang sa masakyan karong kalagkalag gihulma

 Mabungahon ang gipahigayon nga panagtigom karong adlawa taliwala sa mga nagdumala sa Cebu South Bus Terminal (CSBT) ug mga representante sa mga kalungsoran nga adunay rota gikan sa maong terminal.

Gipatawag ang maong tigom ni CSBT General Manager Jonathan "Joy" Tumulak sa  mga representante sa 27 ka mga kalungsoran ug dakbayan, lakip na ang Philippine National Police (PNP), Land Transportation Office (LTO) ug Land Transportation Franchising and Regulatory Board (LTFRB).

Tumong sa maong panagtigom mao ang pagsubay na daan sa possible nga mamahimong suliran sa nagsingabot nga adlaw sa Kalag-Kalag.

Natan-awan nga adunay kakuwangan sa mga buses ug uban pang mga masakyan padulong ngadto sa habagatang bahin sa probinsya.

Dili kini paigo sa bagang duot sa mga pasahero nga mudagsa unya aron pagpauli, lakip na ang muadto tabok sa lalawigan sa Bohol ug Negros Oriental.

Matod ni Tumulak, gitan-aw nga nga dili mumenos 300,000 ka mga pasahero ang mudagsa unya sugod karong Octobre 31.

"Sa miaging tuig, mikabat og 266,000 ang atong naihap nga mga pasahero panahon sa kalag-kalag, magkasaka kini matag tuig," matod ni Tumulak.

Tungod niani, gikasabotan nga hangyuon ang mga Mayor sa mga kalungsuran nga mupadala og mga sakyanan aron sa pagserbisyo sa kinsa unya ang dili makasakay anang panahona.

"Ato gi-awhag ang mga LGU nga mopagamit sa ilang mga sakyanan arun makuha ang mga na stranded nga pasahero ug i priority ang PWD, mabdos, senior citizen ug mothers nga nagda ug gagmay pa nga bata," matod ni Tumulak. 

Gihangop dayon kini sa mga miapil sa maong tigomm gani adunay mga Mayor nga misugot dayon bisan sa tawag lang sa telepono.

Gawas niana gihisgutan usab nila ang kabahin sa kahapsay ug seguridad sa  maong mga adlaw.

Aduna unya mga dugang mga tawo gikan sa PNP, Rescue Units ug Kapitolyo alang sa maong mga okasyon.

Nasayran nga upat ka adlaw ang walay trabaho panahon sa KalagKalag tungod kay Huwebes ug Biernes ang Adlaw sa mga Kalag (Nobyembre 1) ug Minatay (Nobyembre 2), dayon Sabado ug Domingo.

Sa katapusan pod unyang semana sa Nobyembre, laing taas igpahulay tungod kay ang Nobyembre 30 Biernes man.

Gipanguluhan ni Tumulak ang pagpahingusog sa koordinasyon sa mga kalungsuran ug sa ubang sector aron masulbad ang mga suliran ug mapahapsay ang operasyon sa CSBT. (fcc)