Pakighalok di makatakod og AIDS

Dili makatakod og HIV ang pagpakighalok

Mao kini ang usa sa giklaro sa opisyal sa Department ofHealth 7 (DOH) kabahin sa pagtakod sa human immune-deficiency virus (HIV) nga maoy nahimong hinungdan sa Acquired Imuno Deficiency Syndrome (AIDS).

Matod ni Francis Irving Baring, Nurse 3 sa DOH nga dili tinuod nga matakdan ang usa ka tawo kun makighalok sa pasyente sa AIDS o HIV.

“Kini tungod kay magkinahangkan ka og walo ka litro nga laway aron mutakboy ang maong sakit sa imong kaluwasan,” matod ni Baring.

Nag-una hinuon ang pagtakod sa HIV pinaagi  sa penetration, sa pagsulod sa kinatawo kun makighilawas ug ang pagsagol sa dugo sama sa pagpasa pasa og dagom alang sa mga tigamitan og ginadiling drugas.

Si Mr. Francis Irving Baring, Nurse 3 sa DOH7 naghisgot bahin sa estado sa HIV/AIDS sa Sugbo 

Karong tuiga mikabat na og 48,435 ang adunay AIDS sukad pa sa unang pagkamatikod niini niadtong 1984.

Dinhi sa Central Visayas, naabot na og 5,356 hangtod Oktubre rong tuiga. Labing daghan niining mga kaso nga natala anaa sa lalawigan sa Sugbo.

Nahibaw-an nga 91 porsyento o 4,913 sa mga kaso ang anaa sa dakbayan; 267 ang anaa sa lalawigan sa Bohol; 162 sa Negros Oriental ug 14 ang anaa sa Siquijor.

Kasagaran sa mga natakboyan mao tong tigamitan og ginadiling drogas og nagpasa pasa kini og dagom sa pagamit niini. 

Sukwahe sa ubang rehiyon nga ang nag-unang matang sa pagtakboy mao ang pakighilawas sa mga lalake sa isig ka lalake o male having sex with male (MSM).

Gipanghinaot sa DOH nga ang mga autoridad o ang kapolisan muhimo pa gayud og hingusgang aksyon sa pagsuta sa tinubdan sa maong mga drogas.

Ug gawas niana, giawhag sa DOH ang paglikay sa walay proteksyon nga pakighilawas sa isigka babaye o lalake o sa duha man ka mga sexes.

Matod niana, nagpabilin nga libre ang  mga condoms ug mga lubricants sa barangay health centers.

Samtang giawhag pod ang publiko sa dili pagduha duha sa pag suta o pag test sa HIV tungod kay libre lamang kini. (fcc/PIA7-Cebu)