MGA SSS pensioners nakadawat na sa 13th month pension

Gipahibaw sa state run Social Security System (SSS) nga nakadawat na ang kapin sa 2.4 million ka mga pensioners sa ilang 13th month pension pay sa wa pa miabot ang Disyembre.

Gipahibaw ni SSS President ug Executive Officer Emmanuel F. Dooc nga nakapagawas na og balor P21.9 billion sa mga disbursing partner-banks niadto pang Nobyembre 15.

Kini aron maabot na sa kamot sa mga pensionado ang ilang pension sa Disyembre ug laing usa ka buwan nga 13th month pension.

Kapin sa P10 bilyones ang sa pension sa Disyembre og laing P10 bilyones ang subra nga buwan.

Matod ni Dooc nga giplantsa na sa Philippine Postal Corporation (Philpost) nga mauna ang paghatod sa mga cheke sa SSS sa buwan sa Disyembre.

Siya nagkanayon nga aduna gihapoy 15,000 ka mga pensioners sa mga lagyong lugar ang  gusto gihapon nga makadawat sa ilang pension pinaagi sa cheke nga ipadala sa mail.

Ang 13th month pension gihatag nga dugang benepisyo sukad niadtong 1988.

50 ka paresan mipirma'g libre'ng FOREVER sa Compostela

Habal-habal and forever 

Usa kini sa 50 ka mga paresan nga nanumpa nga mag-inunungay hangtod sa kahangturan sa gihimo nga mass wedding sa lungsod sa Compostela kagahapong adlawa didto sa barangay Cabadiangan Gym.

Matod ni Fe Lawas, ang Public Information Officer sa lungsod sa Compostela nga ika lima na kini nga higayon ang pagpakasal nga dinaghan sa mga nag ipon ipon, o ang mga gusto gyud nga ma pormal na ang ilang panagpuyo pinaagi sa sakramento.

Si Reverend Father Scipio Deligero ang mi selebrar  ug nangluhod mao ang mga opisyales sa Compostela gipanguluhan ni Mayor Joel Quiño ug Bise Mayor Joy Abing ug ang mga konsehales.

Si Father Deligero mitambag sa mga gikasal nga padayon ang paghigugmaay ug ang pagsimba sa Ginoo.

"Magkita kita gihapon ta sa simbahan matag Domingo ha," matod sa pari.

Ang mga magtiayon gipasimba og upat ka Domingo sa matag alas sais sa buntag aron sila maanad.

Lakip usab sa mitestigo mao ang hepe sa kapolisan si PSInsp Junafe Vergara, SFO4 Roger Loro.

Matod ni Lawas nga ang gasto sa magtiayon mao ra ang ilang sakyanan ug sinena.  Ang munisipyo na ang milibre sa pagkaon, lakip na ang mga decorations, ug program ug souveniers.

Gi libre na sa Local Civil Registrar ang paghikay sa Certificate of No Marriage (CENOMAR) ingon man ang Marriage Certificate.

Ang mga Department Heads ang nag contribute sa mga regalo.


Ang Compostela anaa sa habagatang bahin sa Sugbo.

Usa kini sa mga nagtubo ang eonomiya tungod sa mga nagkalain lain ng mga subdivisions and developments nga anaa didto karon. (fcc)