Cebuano News: Aduna ra'y tambal og bakuna batok sa rabies

CEBU CITY (PIA)--- Mga medisina alang sa rabies sa tawo og sa hayop anaa na sa mga publikong pasilidad.

Gibutyag sa mga opisyal sa Department of Health og sa Department of Agriculture nga anaa na dinihi sa Sugbo ang mga nagkalain laing mga medisina alang sa pagbatok sa rabies og ang pag ayo sa mga nataptan niini.

Matod ni Dr. Eugenia Canal, ang Program Coordinator sa Regional Medical Rabies sa DOH, sukwahi sa mga miaging tuig, ang mga tambal sa mga napaakan ania na dinhi sa Sugbo.

Gipakatap na kini sa mga Animal Bite Treatment Centers og ingon man sa mga pribadong mga botika, matod ni Canal.

Nasayran nga ang gobyerno muabaga sa duha sa upat ka  tira o shots alang sa kumpletong treatment sa usa ka tawo nga napaakan og iro.

"Ang nabling duha mapalit na sa pasyente sa mga botika og dili na kinahanglan nga muadto pa og laing lugar" matod ni Canal.

Mitumaw ang pangutana sa dihang usa sa mga mitambong sa "Bloggers Forum" nagkanayon nga sa dihang napaakan siya kaniadto gikinahanglan pa nga kuhaon ang maong bakuna gikan sa laing probinsya.

Si Canal mipasalig nga adunay 18 ka mga Animal Bite Treatment Centers ang anaa sa probinsya sa Sugbo diin ang mga pasyente nga muduol niini makatagamtam sa benepisyo sa Philhealth.

Sa laing bahin, gipasalig usab Dr. Mary Ann Gabona, sa Cebu Provincial Veterinary Office, nga libre ang pagpabakuna sa mga iro ngadto sa mga veterinary offices sa mga local government units.

Lakip sa mga libreng serbisyo mga ang pagpakapon sa mga iro aron di kini magdaghan og maghatag na unya og kadaut sa tawo og property.

Dinhi sa syudad sa Sugbo giawhag ni Dr. Pilar Romero nga ipa rehistro ang mga iro sa mga tag-iya ngadto sa ilang opisina.

Lakip kini sa adbokasiya nga "Respobsible Pet Ownership".

Ang buwan sa Marso gi declarar nga "Rabies Free Month". (mbcn/fcc/PIA7-Cebu)

- See more at: PIA website.