Cebuano News: Hiniusang programa alang sa mga libud suroy tutukan sa nagkalain laing grupo sa dakbayan

Hiniusang  programa alang sa issue sa mga libud suroy og mga kabatan-onang nahisalaag, pandayon sa mga nagkalain laing grupo sa komunidad.

PI Arieza Otida mipresentar sa sugyot sa pagsulbad sa mga libud suroy 

Gipanguluhan sa Womens and Protection Desk- Family Gender Juvenile Services (WPD-FGJS) sa Cebu City Police Office(CCPO), kapin sa 20 ka mga grupo ang milingkod aron pagtuki sa pagsulbad sa maong problema.

Ang problema sa mga libud suroy, ang nag una nga gitutukan sa mga police tungod kay matod pa sa hepe sa WPD-FGJS PI Arieza Otida, tuburan kini sa mga krimen sa komunidad.

“Kasagaran aning mga libud-suroy, adunay problema sa pamilya, og kani sila gamiton sa mga bating element sa pagbuhat og krimen sama sa pangawat,” matod ni Otida.

Matod niya ang maong problema nagtuyok tuyok o way kasulbaran tungod kay human sa pagbuhat sa kapolisan og rescue operation, mabalik raman gihapon ang mga batan-on sa kadalanan.

Si Otida nagkanayon nga ang mga civic organizations adunay mga programa para sa kabatan onan apan naglahi lahi kini o walay paagi nga ma sustener.

Gisugyot sa kapolisan ang pagbuhat og usa ka Shelter diin mapahimutang dire ang mga na rescue og dinhi mahitabo ang edukasyon og dibersyon apil napod ang mga programa diin mabalik sila pag usab sa normal nga panginabuhi sa komunidad.

“Dili namo makaya ang maong problema og nanginahanglan mi sa inyong tabang,” matod sa kasamtangang hepe sa CCPO nga si PSSUPT Benjamin Santos.

Nagkasinabot ang mga mitambong nga magtigom pag usab sunod buwan aron sa pag panday sa maong programa nga tutok lamang niini nga issue.

Nasayran nga adunay mga 400 kapin ka mga libud suroy ang anaa karon sa dakbayan sa Sugbo.

Ang mga mitambong sa tigom mao ang Zonta Club of Cebu, Rotary of Cebu, LIONS Club International, Share a Child Movement, Children of Cebu, SOS, Dilaab Foundation, Community Scout Center for the Youth, Cebu City Task Force for Street Children, Department of Social Welfare and Services, Philippine Information Agency, Childrens Legal Bureau, City Prosecutors Office, Legal Alternatives for Women  og ang 11 ka mga Police Stations sa CCPO.