OPISYAL NGA PAMAHAYAG gikan sa mga awtoridad bahin sa Inabanga encounter

Miluwat og opisyal nga pamahayag ang kasundaluhan ug kapulisan taliwa sa nahitabo nga engkwentro batok sa gidudahang mga miembro sa armadong Abu Sayyaff didto sa lungsod sa Inabanga.

Gipasalig sa mga kadagkoan nga dili kini makaapekto sa kinatibuk-ang siguridad sa Lalawigan ug andam sila sa bisan unsang sitwasyon.

Gitan-aw nga mudagsa ang mga dumuduong sa lalalwigan sa Bohol sa mga bulan sa bakasyon.  Nagkasaka ang ekonomiya sa turismo bisan pa man sa mga naagian nga mga problema sa insurhensiya ug linog.  

Ang Gobernador sa Sugbo, Hilario Davide III, nagkanayon nga kanunayng mabinantayon ang mga anaa sa Sugbo tungod kay kasikbit lang kini sa Bohol. 

Mga giya sa pag-biyahe og luwas karong bakasyon

Karong Semana Santa ug summer season, gipaabot nga daghang mga Pinoy ang mobakasyon sa ubang lugar.  

Sa infographic nga gipagawas gikan sa Philippine National Police (PNP) Police Community Relations Group, subli nilang gipahinumdoman ang mga motorista sa BLOWBAG checklist sa dili pa mobiyahe.

Battery: Alisdan ang baterya sa sakyanan matag ikaduhang tuig.

Light: Siguradohong mo-gana og maayo ang headlights, brake lights, signal light ug emergency light.

Oil: Magpa-change oil bisan usa  ka semana sa dili pa ang gitakdang biyahe. Mas maayong magdala og extra nga oil basin kalit kining kinahanglanon.

Water: Susihon ang water level ug tulo sa radiator. Mas maayong magdala usab og reserbang tubig sa biyahe basin kinahanglanon kini.

Brake: Ipasusi sa eksperto ang preno, ang brake pad ug fluid level. Mas maayo usab kung adunay extrang botelya sa brake fluid sa sakyanan basin kalit kining kinahanglanon.

Air: Gamit og tire air pressure gauge o ipasusi sa eksperto ang ligid. Ang dalang spare tire, mas maayong ipasusi usab ug siguradohong walay buslot o hungaw sa mga ligid.

Gas: Susiha kun mogana ang fuel gauge sa sakyanan. Kun kinahanglan nang magpakarga og gas, himuon na kini ug dili na mamasin nga sa sunod na nga gas station magpakarga. Magpa-gasolina na sa sakyanan sa dili pa mobiyahe. (ni Elvie Bongosia/PIA-Bohol)

Makita ang uban nga mga kasayuran sa www.pia.gov.ph .  Sunda ang mga updates sa Facebook PIA Cebu Infocen account o sa PIA Cebu page