BABAYENG SUGBOANON : Tomasa Nable, fruit vendor- Kainit sa Pagpaninda

Kun anus-a siya pahunungon sa Dios, diha pa siya mutuman.

Siya si Tomasa Nable, 93 anyos, byuda og nagpuyo sa barangay Cantipla, bukirang barangays sa dakbayan sa Sugbo.

Nakit-an siya nga naglukdo og usa ka nigo nga saging tundan og lakatan nga matod pa, iyang inangkat sa barangay Busay.

Naglabi sa iyang mga katuigan mao ang pagpaninda og bisan unsa lang, kasagaran niini ang mga prutas nga gikan sa kabukiran.8

Upat iyang anak, og ang pinakataas nga grado, gradwado og high school. Puro na sila mga minyo.

Naglayat  layat na lang si Nang Tomasa sa iyang mga anak aron magbantay sa iyang mga apo.

Apan tunga sa adlaw, maninda una siya, kay dili sya gusto nga magpa bug-at sa iyang mga anak.

"Maayo nalang para sa akoang mga tambal og palit kendi sa mga apo," matod ni Nang Tomasa.

Balewala kaniya ang naglagiting nga kainit sa adlaw og ang kakuyaw sa mga naghaguros nga mga sakyanan.

Siya makit-an sa buhatan sa Cebu City Police Office, Gorordo ngadto padulong sa Imaculada Concepcion og sa buhatan sa Department of Labor and Employment (DOLE).

Nang Tomasa, POWER WOMAN ka!

*Ang buwan sa Marso, buwan gipahinungod sa kababayen-an